仔俚哚当水哉，阿是？”朴斋顿住嘴说不出，只模糊搪塞道：“故也无啥上当水。”善卿笑道：“耐瞒我做啥囗？我也匆来说耐，到底耐自家要有点主意末好。”朴斋连声诺诺，不敢再说。善卿问：“故歇一干仔陆里去？”朴斋又没得回答。善卿又笑道：“就是去打茶会末阿有啥勿好说嗄？我搭耐一淘去末哉。”原来善卿独恐朴斋被陆秀宝迷住，要去看看情形如何。

朴斋只好跟善卿同望南行。善卿慢慢说道：“上海夷场浪来一埭，白相相，用脱两块洋钱也无啥。不过耐勿是白相个辰光，耐要有仔生意，自家赚得来，用脱点倒罢哉。耐故歇生意也无拨，就屋里带出来几块洋钱，用拨堂子里也用勿得啥好。倘忙耐洋钱末用光哉，原无拨啥生意，耐转去阿好交代？连搭我也对勿住耐哚老堂哉（口宛）。”朴斋悚然敬听，不则一声。善卿道：“我看起来，上海场花要寻点生意也难得势哚。耐住来哚客栈里，开消也省匆来，一日日哝下去，终究勿是道理。耐白相末也算白相仔几日天哉，勿如转去罢。我搭耐留心来里，要有仔啥生意，我写封信来喊耐好哉。耐说阿是？”朴斋那里敢说半个“不”字？一味应承，也说是“转去好”。甥舅两个口里说，脚下已踅到西棋盘街聚秀堂前。善卿且把闲话掠过一边，同朴斋进门上楼。

第十二回终。